نص غنائي بعنوان أحلام للشاعر أيمن بلال
......أحلام. ...
وتدور الحياه وتلف أيامها
وأنا وإنتي ف رحلة قلوب
ويتقلب علينا كأس زمانها
وإحنا من كأس لكاس ندوب
.......
ولكل حبيب نلقي حبيب وخل
وأنا وإنتي شمسنا مالها ضل
حكايتنا توهة وتاه معاها الحل
مع إننا ف عز البكاء بنسعد قلوب
.......
مدي الإيدين للأيادي المشتاقين
طلة بعينيكي عالعيون الحيرانين
قولي كلمة تبل ريق العطشانين
ليه ياحياه بنعيش شروقك غروب
.......
وليل زمانك مخاصم نور القمر
حتي نهارك نوره مفارق النظر
إشتاق الندي للقا ورق الشجر
صعب اللقا لو كان الفراق مكتوب
.......
وتفضل ذكريات باقية ف غناوينا
تحكي إللي كان لينا وكان علينا
ودمعة فرح ويا ندم تضحكنا تبكينا
ولا احنا بننسي ولا احنا نتوب
.......
يافرحنا لما ينده علينا الفرح
يادمعنا لما يسكن قلوبنا الجرح
ياعمرنا وطعم شهده بطعم الملح
وأيامنا رحلة ألم بين شروق وغروب
.......
وسنين وإحنا بنسأل نفس السؤال
ليه حياتنا الضحكة فيها بقت محال
عايشين وبيننا وبين الأمل مرسال
ياترى جاي ولا خلاص فارقت الدروب
........
عديت ياعمر وأحلامنا لسة صغيرة
عايشة نفس الحكاية مش متغيرة
كنا ورحنا بس روحنا لسة متحيرة
ما بين حياتنا وحياة قلوبنا لما تدوب
.......
أيمن بلال
تعليقات
إرسال تعليق